WfH Series: NALIKA SING WFH NYAMBI NDAMPINGI LFH

--Sito Mardowo

===== Mohon maaf teman-teman WI terkasih, saya menulis menggunakan bahasa Jawa Ngoko Alus Populer dan saya campur aduk dengan sedikit bahasa Indonesia.
=======

Nalika virus Corona wis handerba jroning tanah Nuswantara,  donyane kaya-kaya mandheg. Pemerintah kanthi waskitha aweh paugeran tumrap kabeh warga ing saindenging bangsa Indonesia. Tlatah kulon ing Sabang nganti tumekeng tlatah wetan Merauke kaajab bisaa anut lan nyengkuyung mungguhing paugeran kuwi mau. Salah sawijining kawicaksanan pemerintah sing paling ‘populer’ yaiku WFH utawa Work From Home kang andharane nyambut gawe saka ngomah lan LFH Learning From Home kang andharane sinau sakan ngomah. WFH katujokake marang para pegawai utawa karyawan, menawa LFH katujokake marang para siswa sing sinau jroning pawiyatan.

Magepokan karo irah-irahan kasebut, aku mung pengin ngudarasa pengalamanku babagan WFH lan LFH kuwi mau nalika nglakoni ing ngomah. Nalika kawicaksanan WFH lan LFH lumadi, sak banjure aku lan anakku murwani pakaryane dewe-dewe. Sajroning nandangi gaweyanku tak sambi uga mbiyantu anakku anggone sinau online menawa ana babagan kang durung ngerti. Sajroning mbiyantu anakku kuwi, banjur tuwuh pamikirku menawa ana saperanganing bab sing dadi pepapalang nalika siswa sinau, saengga sing sinau ora bisa jangkep utawa optimal. Nalika ora bisa jangkep mesthine dadi ora kompeten. Mbok menawa iki dadi bahan penggalihan kita kabeh. Babagan pepalang siswa sinau dewe (online) ana ing ngomah yaiku:

1.   Tugas-tugas sing diwenehake kanthi online ora bisa nggambarake tuntasing kompetensi sing kudu dikuwasani siswa. Contone, nalika pelajaran bahasa Inggris babagan tenses. Siswa diparingi tugas nggawe kalimat utawa ukara sing migunakake paugeran tenses. Kamangka kanggo gawe kalimat kuwi, sakdurunge kudu diterangake kanthi gamblang luwih dhisik carane nggawe kalimat nganggo paugeran tenses. Nanging sanyatane, siswa didawuhi maca babagan tenses banjur didawuhi gawe kalimat. Mesthi wae tugas sing digawe ora bisa dirampungake kanthi sampurna, amarga beblesing pemahaman durung kacakup, namung sak gadhuke anggone sinau wae.

2.   Pendamping durung mesthi bisa ngrampungake masalah sing diaepi para siswa. Mbok menawa anakku luwih mujur karana bapakke uga prei saengga bisa diajak rembugan menawa ana tugas kang angel. Sawetara embuh para siswa sing bapak-ibune tetep kudu kerja kantoran, tuladhane bapak ibune sing ngasta ana ing rumah sakit. Nanging pranyata nalika ana pendamping wae durung mesthi bisa ngrampungake tugase putrane. Contone aku. Nalika anakku takon soal-soal pelajaran Matematika babagan ‘persamaan dan pertidaksamaan linear satu variabel’ wae aku ora bisa nuduhke (wong karawitan ditakoni matematika…. Duuuhh). Sawetara anakku tak cek cendhek-dhuwure sing dimangerteni isa nerangke kanthi gamblang. Nanging nalika di cak’ake ana ing soal, diwolak-walik dadi bingung. Sawetara aku ora bisa nuduhke cara nggarap soal sing bener. Pungkasane rembug anakku takon karo kangmase sing ana semarang kanthi online uga, nanging babagan iki tetep wae ora ndadekake anakku mudheng kanthi jangkep.

3.   Wektu nggarap tugas ora ana wektu kang gumathok. Nalika bapak-ibu guru gawe RPP, saben materi wis dirancang wektu kang kudu digunaake kanggo ngrampungke salah sawijining kompetensi. Ukuran iku kanggo nodi pikiran siswa utawa ‘pembiasaan’ siswa anggone nguwasani kompetensi kanthi bebles. Sawetara iki, tugas-tugas sing diparingake kanggo siswa mbok menawa bapak-ibu guru ana sing lali babagan iki. Tugas ana sing nganggo pathokan jam pelajaran, tuladhane ‘kerjakan tugas ini sesuai JP ke 4-5, setelah selesai dikirim melalui emal: bla..bla…bla. Email Ibu tunggu sampai pukul 10.15.’ Nanging ana uga sing maringi tugas nganggo pathokan dina “ kerjakan tugas berikut, nanti diemail paling lambat pukul 24.00’. Ana maneh ana sing nganggo pathokan mlebu sekolah.” Kerjakan tugas berikut ini. Tugas ditulis pada kertas HVS dan dikumpulkan pada saat masuk sekolah’. Ngematke pratelan-pratelan kuwi mau, mbok menawa perlu kawigaten-kawigaten sing underane ngenani babagan beblesing kompetensi sing dironce karo babagan suwene anggone nguwasani kompetensi.

Saksuwene awake dewe dadi WI lan saksuwene awake dewe ndampingi guru, durung nate kepikiran babagan formulasi guru nalika ndampingi siswane nalika sinau sacara online kaya kahanan saiki. Formulasi  kaya apa sing bisa ditrepake, nanging kompetensi siswa sing wis karancang tetep bisa dilakoni kanthi bebles.

Babagan WFH lan LFH  iki amung mampir ana ing pikiranku, trus tak iling ana tulisan iki. Babar blas aku ora nggunakake referensi apa-apa,…. Kaya sing tak aturke ing ngarep. Aku mung ngudarasa. Matur nuwun kersa maos. 

Salam, Sito Mardowo